Հուշ-ցերեկույթ նվիրված Հենրիկ Բաբախանյանի ծննդյան 75-ամյակին


    …Հայրենիքը հեռվից, օ˜, ինչպես են սիրում,
ինչպես են փայփայում հուշերի մեջ գունատ,
կարոտախտը ջերմում, տարածվում է անվերջ,
և երակներն արյան տրոփում են ցավից…
Հենրիկ Բաբախանյան
Բանաստեղծ Հենրիկ Բաբախանյանի ծննդյան 75-ամյակին նվիրված հուշ-ցերեկույթը տեղի ունեցավ հոկտեմբերի 25-ին՝ Ավ. Իսահակյանի անվան Կենտրոնական գրադարանի լեփ-լեցուն դահլիճում: Ներկա էին բանաստեղծի հարազատները, ընկերները, մշակույթի և հասարակական գործիչներ, բազմաթիվ ընթերցողներ: Հիշատակի ցերեկույթը կազմակերպվել էր Հայաստանի գրողների միության և «Մշակույթի հայկական ֆոնդ»-ի հետ համատեղ:
«Բանաստեղծության վերաբերմամբ ես-ի գերակայության բացառումը, ընդհանրապես հակակշռման և դրա միջոցով հաղթանակի հասնելու բացառումը Հենրիկ Բաբախանյանի առանձնահատկությունն ու նրան ճիշտ ընթերցելու բանալիներից է: Իրենը հաղթանակը չէ, այլ՝ հաղթահարումը: Եվ այդ ճանապարհին միշտ չէ, որ պարտությունը խուսափելի է: Նախ՝ իրեն, ապա և՝ սիրուն, մարդկային թուլություններին, հավատարմությանն ու հավատավորությանը: Եվ պարտությունը դառնում է բանաստեղծություն, այսինքն՝ փորձը դառնում է պատում: Պարտությունը պատմելու վաստակած իրավունքով: Որովհետև ինչպես հաղթանակը՝ պարտությունն էլ կռվողինն է. փախչողը ո′չ այս, ո′չ այն է ունենում: Ահա, մինչև վերջ կռվելու, պարտվելով հաղթելու, անկումներով վեր բարձրանալու այս հավատամքն է Հենրիկ Բաբախանյանի բանաստեղծության արյունատար համակարգը և ոչ մի տեղ թանձրուկ ու խցանում չունի…»
Ներսես Աթաբեկյան
Բացման և ողջույնի խոսքով հանդես եկավ բանաստեղծ, նկարիչ, «Մշակույթի հայկական ֆոնդ»-ի նախագահ Արևշատ Ավագյանը.
-Միշտ լրջություն կար Հենրիկի խոսքի, պահվածքի մեջ… Նրան երբեք բարկացած չեմ տեսել: Եվ նրա ամբողջ էության մեջ նստած էր հայ մարդու հայրենասիրությունը, արդարամտությունը…Նա խոհեմ, զգույշ, մի քիչ էլ կասկածամիտ անձնավորություն էր և միաժամանակ շատ արդարամիտ ու ճշմարտացի…
Բանաստեղծի մասին հուշերով, գրական գործունեության մասին կիսվեցին ՀԳՄ նախագահ Էդվարդ Միլիտոնյանը, բանաստեղծի որդին Մհեր Բաբախանյանը, բանաստեղծ, թարգմանիչ, բանասիրական գիտությունների թեկնածու, գրականագետ Ներսես Աթաբեկյանը, մանկավարժ Գոհար Պետրոսյանը և այլք:
Երաժշտական կատարումներով հանդես եկան երգիչ, երգահան Արսեն Համբարյանը, բանաստեղծ, բանահավաք Ալեքսանդր Էքնոսյանը և Արմինե Եղիազարյանը՝ Աննա Մանուկյանի նվագակցությամբ:
Ներկաներն ունկնդրեցին հեղինակի ստեղծագործությունները՝ բանաստեղծի թոռնուհի Նանե Բաբախանյանի և դերասանուհի Գայանե Սամվելյանի ընթերցմամբ:

Հեղինակային իրավունքները պաշտպանված © են