Գ. Մարտիկյանի «Ապրելու բանաձև»մատենաշարի 11-րդ հատորի շնորհանդես


    Փետրվարի 16-ին Ավ. Իսահակյանի անվան ԿԳ-ում տեղի ունեցավ ռադիոլրագրող, հրապարակախոս Գոհար Մարտիկյանի «Ապրելու բանաձև» մատենաշարի 11-րդ հատորի շնորհանդեսը:
20-րդ դարավերջի հայ հերոսներից շատերին ու նրանց սխրանքի պատմությամբ սնված ու զորացած հայ անմահ հերոսների հիշատակին է ձոնված պատմական, գեղարվեստական և վավերագրական բազմահատոր «Ապրելու բանաձև» մատենաշարի 11-րդ հատորը՝ որպես պատգամ սերունդներին, որպես հնչող շեփոր՝ ՀԱՐԱՏԵՎՈՒԹՅԱՆ: 11-րդ հատորը նվիրված է 2016թ-ի ապրիլյան պատերազմում զոհված Արցախի հերոսներին, ինչպես նաև Արցախի պատերազմում նահատակված Կապանի տարածաշրջանի մարտիկներին: Մատենաշարի 11-րդ հատորը լույս է ընծայվել ՀՀ նախագահի աշխատակազմի կողմից «Կանանց հանրապետական խորհուրդ » ՀԿ-ին տրամադրված դրամաշնորհի և Հայաստանի երիտասարդական հիմնադրամի հայտարարած մրցույթի շրջանակներում: Միջոցառմանը ներկա էին հերոսի մահով ընկած քաջորդիների ծնողներ, աշակերտներ, ՀՀ նախագահի աշխատակազմի ներկայացուցիչներ, ՀՀ ՊՆ 24923 զորամասի զինվորներ, բազմաթիվ հեռուստա և ռադիո լրագրողներ և այլոք: Շնորհանդեսի սկիզբն ազդարարվեց Արցախյան հերոսամարտին նվիրված տեսաֆիլմի ցուցադրությամբ: Ներկաներին և հյուրերին ողջունեց միջոցառման հանդիսավար, կանանց հանրապետական խորհրդի նախագահ, բանասիրական գիտությունների դոկտոր Աիդա Թոփուզյանը: Ողջույնի և երախտագիտության խոսքով հանդես եկան Հայաստանի երիտասարդական հիմնադրամի հոգաբարձուների խորհրդի համակարգող, ՀՀ ԱԺ պատգամավոր Կարեն Ավագյանը, ՀՀ նախագահի դրամաշնորհային ծրագրի համակարգող Գայանե Մանուկյանը, արձակագիր, հրապարակախոս Դավիթ Մկր. Սարգսյանը, հեռուստալրագրող Դավիթ Սարգսյանը, «Կանանց հանրապետական խորհուրդ»-ից Երանուհի Կարապետյանը, զոհվածի այրի՝ «Եռաբլուր» թանգարանի տնօրեն Զարինե Հակոբյանը, լրագրող, հրապարակախոս Հովհաննես Պապիկյանը, գրող, հրապարակախոս, հասարակական գործիչ Թորոս Թորանյանը և այլք: Դերասանուհի Գայանե Սամվելյանը ընթերցեց «Ապրելու բանաձև» մատենաշարի 11-րդ հատորում զետեղված գրող, արձակագիր Վահագն Գրիգորյանի «Երկու խոսք, երկու կարծիք» և Թորոս Թորանյանի նամակը՝ ուղղված Գոհար Մարտիկյանին:
«Այս 11 հատորներում յուրաքանչյուր հերոսի պատմությունն առանձնահատուկ է, առանձնահատուկ է նաև ամեն մի հատոր: Այդ տխուր, բայց և հերոսական պատմությունը կերտելիս, թող զարմանալի չթվա, ես երջանկության զգացում եմ ապրում: Երջանկության զգացում եմ ապրում այն պատճառով, որ տեսնում եմ այս հատորներում հայի տեսակն է պահպանվում: Այս էջերում զետեղված հերոսները առանձին - առանձին յուրօրինակ կերպարներ են՝ իրենց մեծ սխրանքներով»,-իր խոսքում նշեց տիկին Մարտիկյանը: Հանդիպման ավարտից հետո հեղինակը դեռ երկար շրջապատված էր ընթերցողներով, որոնց սիրով և իր մակագրությամբ նվիրեց 11-րդ հատորը:

Հեղինակային իրավունքները պաշտպանված © են