Հունիսի 1 Իսահակյան գրադարանում


    Մանկական երգեր, փուչիկներ, մուլտֆիլմեր, գույնզգույն ժապավեններ, խինդ, ծիծաղ, տոնական տրամադրություն… Այսպես սկվսեց Ավ. Իսահակյանի անվան Կենտրոնական գրադարանի հունիսմեկյան առավոտը: Գրադարանի հյուրերն էին մեր փոքրիկ բարեկամ-ընթերցողները: Նրանց սպասվում էին գեղեցիկ անակնկալներ: Ներկայացվել էր «Հեքիաթին հյուր», « Բնության զարմանահրաշ աշխարհ», «Տարվա հոբելյար գրողներ» խորագրերով գրքային ցուցահանդեսների շարքը: Դահլիճում ցուցադրված էր Հակոբ Կոջոյանի անվան գեղարվեստի դպրոցի սաների՝ «Բնության ներկապնակ» խորագիրը կրող, գեղանկարչական աշխատանքները: Տեսասրահում ցուցադրվում էր մուլտֆիլմեր և մանկական հոլովակներ: Կազմակերպվեցին շրջայցեր գրադարանում: Երեխաները մասնակցեցին գրադարանի հարթակում կազմակերպված «Իմ սիրելի հեքիաթի հերոսը» խորագրով կավճանկարչությանը: Բացման և ողջույնի խոսքով հանդես եկավ դերասանուհի Գայանե Սամվելյանը, ով ընթերցեց Երևանի քաղաքապետ Տարոն Մարգարյանի տոնական ուղերձը՝ նվիրված երեխաների պաշտպանության միջազգային օրվան: Մասնակիցներին հանձնվեցին պատվոգրեր՝ «Կոմպոզիցիայի ճիշտ կառուցում», «Լավագույն գունային ընտրություն», «Լավագույն նկար» և «Լավագույն գծանկար» անվանակարգերում հաղթելու և շնորհակալագրեր՝ ակտիվ մասնակցության համար: Կավճանկարչությունից հետո երեխաները շտապեցին դահլիճ, ուր տեղի ունեցավ հանդիպում բանաստեղծ Սաթենիկ Ղազարյանի, գրող, մնջախաղաց Նաիրա Եդիգարյանի և բանաստեղծ, արձակագիր, երաժիշտ, մանկավարժ, լրագրող Արա Ալոյանի հետ, ինչպես նաև վերջինիս «Կատուն, որն ուզում էր դառնալ կոմպոզիտոր» գրքի շնորհանդեսը: Գրքից հատվածներ ընթերցեցին «Իսահակյան» թատերախմբի սաներ Վահագն Տուլբենջյանը և Ժաննա Մաթևոսյանը: Երեխաներին ողջույնի խոսք հղեց նաև գրող, հեռուստալրագրող, հասարակական գործիչ Վրեժ Սարուխանյանը: Երաժշտական կատարմամբ հանդես եկան «Օկի-Դոկի» քոլեջի փոքրիկ երգիչները /կոմպոզիտոր Կարինե Գալյան/, իսկ դաշնամուրային կատարմամբ՝ Բարսեղ Կանաչյանի անվան արվեստի դպրոցի սան Անահիտ Ալոյանը: Նաիրա Եդիգարյանը ներկայացրեց «Իմ տատիկ Թամթիմարիան» հեքիաթը, այնուհետև կազմակերպեց «Ճամփորդություն երևակայական աշխարհում» փոքրիկ մնջախաղի համարը՝ երեխաների մասնակցությամբ: Բոլոր երեխաներին հեղինակները հանձնեցին նվերներ՝ մանկական նկարազարդ գրքեր: Օրվա հաջորդ կեսին, երեխաների պաշտպանության միջազգային օրվա առթիվ Երևանի քաղաքապետարանի նախաձեռնությամբ կազմակերպված միջոցառումների շրջանակում, գրադարանը՝ քաղաքապետի տեղակալ Արամ Սուքիասյանի և քաղաքապետարանի ընտանիքի, կանանց և երեխաների իրավունքների պաշտպանության բաժնի պետ Իդա Խաչատրյանի ուղեկցությամբ, հյուրընկալեց «Հավատ» վատ լսող երեխաների մայրերի հասարակական կազմակերպության շահառու երեխաներին: Փոքրիկներին օրվա առթիվ շնորհավորեցին և ողջունեցին «Ավ. Իսահակյանի անվան ԿԳ»ՀՈԱԿ-ի տնօրեն, ՀՀ մշակույթի վաստակավոր գործիչ Հասմիկ Կարապետյանը և Երևանի քաղաքապետի տեղակալ պարոն Սուքիասյանը: Երեխաներն ունկնդրեցին Շել Սիլվերսթեյնի «Առատաձեռն ծառը» հեքիաթը՝ Հայաստանում ԱՄՆ-ի դեսպանատան աշխատակից Թիֆընի Սիմսի ընթերցմամբ: Երեխաներին ողջունեց նաև Հայաստանում ԱՄՆ-ի դեսպանատան տեղեկատվական ռեսուրսների կենտրոնի տնօրեն Ներսես Հայրապետյանը: Միջոցառման ավարտին բոլոր երեխաները Երևանի քաղաքապետարանի կողմից ստացան նվերներ: Կարծում ենք, որ հունիսմեկյան այս հեքիաթային օրը դեռ երկար կմնա գրադարանի փոքրիկ ընթերցողների մանկական հուշերում…

Հեղինակային իրավունքները պաշտպանված © են