Սեյրանուհի Գեղամյանի «Բազմանկյուն» գրքի շնորհանդես


    Ապրիլի 7-ի Ավ. Իսահակյանի անվան Կենտրոնական գրադարանում տեղի ունեցավ արձակագիր, հրապարակախոս, մշակութաբան Սեյրանուհի Գեղամյանի «Բազմանկյուն» գրքի շնորհանդեսը: Ներկա էին բազմաթիվ ընթերցողներ, մշակույթի և հասարակական գործիչներ, հեղինակի հարազատները և հյուրեր: «Ստեղծագործությունները, որոնք հավաքել եմ այս «Բազմանկյան» մեջ, մշակույթի տարբեր ոլորտներում երկար տարիների իմ աշխատանքի ոչ ամբողջական, բայց կարևոր մասն է:
Տարբեր ժանրերով ու թեմաներով բազմաթիվ հրապարակումներից ընտրված մի քանի նմուշներն ի հայտ են բերում իմ հետաքրքրությունների, որոնումների, դիտարկումների, աշխարհայացքի, ներքին կուտակումների, գեղագիտական չափանիշների հանրագումարը...»։
Սեյրանուհի Գեղամյան
Բացման և ողջույնի խոսքով հանդես եկավ «Ավ. Իսահակյանի անվան ԿԳ» ՀՈԱԿ-ի տնօրեն, ՀՀ մշակույթի վաստակավոր գործիչ Հասմիկ Կարապետյանը և գրադարանի աշխատակիցների ու բազմահազար ընթերցողների անունից հեղինակին հանձնեց շնորհավորական ուղերձ:
Շնորհավորելով Սեյրանուհի Գեղամյանին նոր հրատարակված գրքի առիթով Հայր Կոմիտաս վարդապետ Հովնանյանը նշեց.
-Գիրք, որին հաղորդակցվելուց առաջ պետք է անպայման կարդաս հետևյալ տողերը. «Ինչպես մարդկային հարաբերություններում, այնպես էլ ստեղծագործական ոլորտում ունեցել եմ միայն մեկ սկզբունք՝ ազնվությունը: Իհարկե, մեր օրերում նման մոտեցումը կարծես ծանր խաչ է դառնում, սակայն դա նաև միա´կ մխիթարությունն է՝ հաղթանակի պատրանքով ապրելու համար»:- Ազնվությունը նշանակում է հոգու ներսից լսված Գաբրիել հրեշտակի ավետիսը՝ մաքրության, սրբության, առաքինության, բարիության, ազնվության... դարձվածք, որը կարողացել է իր այս մատյանում ամփոփել հեղինակը...
Կոմիտաս վարդապետը ամփոփեց ելույթը հետևյալ խոսքերով. «Քանի կա գիտակից հայ մայրը, չի կարող երբեք վերանալ և ոչնչանալ ազգը, որի անունն է՝ ընտրված Աստծուց, հայ ժողովուրդ»:
Տոնական շնորհավորանքներով և գրքի լույսընծայման առիթով ելույթներով հանդես եկան բանաստեղծ, նկարիչ, ՀԳՄ նախագահ, ՀՀ մշակույթի վաստակավոր գործիչ Էդվարդ Միլիտոնյանը, գրականագետ, բանասիրական գիտությունների դոկտոր, պրոֆեսոր, ՀՀ գիտության վաստակավոր գործիչ Սամվել Մուրադյանը, Ե. Չարենցի անվան գրականության և արվեստի թանգարանի տնօրեն Կարո Վարդանյանը, Երևանի քաղաքապետարանի հանրակրթության վարչության պետի տեղակալ Սիլվա Աչոյանը, բանասիրական գիտությունների թեկնածու, սփյուռքահայ գրականության մասնագետ, Սիլվա Կապուտիկյան գրական հիմնադրամի տնօրեն Արմենուհի Դեմիրճյանը, նկարչուհի, ազգագրագետ, ՀՀ մշակույթի վաստակավոր գործիչ Լուսիկ Ագուլեցին, լրագրող, պատմաբան, հրապարակախոս, սցենարիստ Սպարտակ Ղարաբաղցյանը և այլք:
Հանդիսությունը հագեցած էր նաև երաժշտական կատարումներով. ելույթ ունեցան միջազգային մրցույթների դափնեկիր Սարգիս Բաժբեուկ-Մելիքյանը, Անուշավան Տեր-Ղևոնդյանի անվան երաժշտական դպրոցի սաները, Անահիտ Սահակյանը:
Երեկոյի հանդիսավարը դերասանուհի Գայանե Սամվելյանն էր:
«Բազմանկյուն» գրքում որպես վերջաբան տեղ է գտել միջնադարյան փիլիսոփա և բանաստեղծ Գրիգոր Պահլավունու իմաստուն առակը.
«Արտույտը, լսելով որ երկինքը փուլ է գալու, պառկում է մեջքի վրա՝ տոտիկները վեր տնկում դեպի երկինք: Տեսնողները զարմացած նայում են նրան ու հարցնում, թե ինչո՞ւ է այդպես պառկել:
Արտույտը պատասխանում է.
-Ասում են երկինքը փուլ է գալու...
-Այ խելքի ծով ճնճղուկ, դու ո՞նց կարող ես քո թույլ ծնկներով պահել երկինքը:
Եվ թռչունը պատասխանում է.
-Ես ի՛մ բաժին երկինքն եմ պահում...»:

Հեղինակային իրավունքները պաշտպանված © են