Հուշ-ցերեկույթ՝ նվիրված գրող Վաչագան Հովհաննիսյանի 85-ամյակին


    Բարի լույս ձեզ՝ ադամորդիք,
Ձեր կարոտին, ձեր աղոթքին,
Եվ անգամ ձեզ, չարի որդիք,
Բարի լցվի թող ձեր հոգին․
․․ Բարի լո~ւյս ձե՛զ... բա~րի լույս ձե՛զ...
Վաչագան Հովհաննիսյան
Հոկտեմբերի 14-ին . Իսահակյանի անվան ԿԳ-ում տեղի ունեցավ հուշ-ցերեկույթ՝ նվիրված գրող Վաչագան Հովհաննիսյանի 85-ամյակին: Սասունցի բանաստեղծ-արվեստագետին կարոտով հիշելու, մեծարելու և շնորհավորելու էին եկել գրողներ, արվեստագետներ, ընթերցողներ և այլոք: «Աղոթքի նման են հնչում գրողի բոլոր ստեղծագործությունները։ Աղոթքներ են՝ գեղեցիկի,լավի և ազգային պատկանելիության մասին։ Աղոթքը թող շարունակվի և հիշատակի ձոն լինի Վաչագան Հովհաննիսյանին»,- իր խոսքում նշեց Ավ․ Իսահակյանի անվան ԿԳ-ի տնօրեն, ՀՀ մշակույթի վաստակավոր գործիչ Հասմիկ Կարապետյանը։
«Իր երազները ինքը համարում էր պատուհաններ`անցած և գալիք օրերի դիմաց , թափառող, կանչող հոգու ձայներն`աշխարհի բոլոր ձայներին ձուլված։ Վաչագան Հովհաննիսյանը բանաստեղծ էր՝ բանաստեղծություն գրելուց առաջ։ Նա ինձ՝ ընթերցողիս, ձեռքս բռնած տանում է իր Սասնա ճանապարհներով, տանում է իր երազները»,-այսպես էր մեկնաբանում գրականագետ, բանասիրական գիտությունների դոկտոր, պրոֆեսոր Սուրեն Դանիելյանը։ Գրող, հրապարակախոս Վրեժ Սարուխանյանը Վաչագան Հովհաննիսյանի պոեզիան համարում է համեստ, զուսպ, կիրթ, ազնվական ու ազնվաշուք: Գրողի ստեղծագործությունների մասին խոսեց գրող, գրականագետ, թարգմանիչ, Վրաստանի հասարակական գիտությունների ակադեմիայի ակադեմիկոս Ֆելիքս Բախչինյանը․«Հաճախ խռովահույզ , հաճախ կարոտաբաղձ, հաճախ միահյուսվում են խռովք ու կարոտ, և ելնում է բանաստեղծի սիրտը, դուրս է հորդում խոսքն՝ իբրև արարող երգի ելևէջ»։ Հաջորդիվ ելույթ ունեցան բանաստեղծ, նկարիչ, թարգմանիչ, Մշակույթի հայկական ֆոնդի նախագահ Արևշատ Ավագյանը, բանաստեղծ, արձակագիր, մանկագիր Լիպարիտ Սարգսյանը, բանաստեղծ Խաչիկ Մանուկյանը, Էջմիածին քաղաքի Վաչագան Հովհաննիսյանի անվան գրադարանի տնօրեն Ասյա Հակոբյանը, մանկավարժական գիտությունների թեկնածու, դոցենտ, գրողի դուստր Արուսյակ Հովհաննիսյանը․«Հայրիկիս համար ամենակարևորը մարդն էր, մայրենի լեզուն, մշակույթը, Էրգիրը և մասնավորապես՝ ընտանիքը»։ Հուշ-ցերեկոն ամփոփեց բանաստեղծ, թարգմանիչ, ՀՀ մշակույթի վաստակավոր գործիչ, բանաստեղծի որդին՝ Հովիկ Հովեյանը․«Նա անընդհատ խոսում էր արդարությունից, իր մեջ ապրում էր ծերունին, մանկահասակը, արդարը, ճշմարտախոսը, երկվորյակը և աշխարհաքաղաքացին»։ Միջազգային և հանրապետական մրցույթների դափնեկիր, նախագահի մրցանակակիր, դաշնակարուհի Շողեր Հովեյանը հանդես եկավ դաշնամուրային կատարումով։ Ողջ ցերեկոյի ընթացքում ներկաները ունկնդրեցին Վաչագան Հովհաննիսյանի ստեղծագործությունները՝ դերասանուհի Գայանե Սամվելյանի ներկայացմամբ:

Հեղինակային իրավունքները պաշտպանված © են